Skitourenwochenende in der Galmihornhütte

D Stimmig am Samsti Morgä im Zug isch no chli vrschlafe gsi. In Brig isch de d Sarah mit emene Rucksack vou Ässe drzuegstosse. Witer isches uf Münster VS, z Dorf isch wenig spetakulär, het aber aues vomä bruucht, u.a oh es Coop für diä vo no es Zmittag bruchä. Nachdäm dr Schlüssu bim Tourismusbüro organisiert isch gsi, hets gheissä uffäuä und ab dr Hoger z druf. Zersch no uf em Wägli när dür z Wäudli ä chlei ga Spitzcherine üebe, obe bir Galmihornhütte acho hei mir zmitaget. Nachem zmittag si mir witer dr bärg deruf bis zur Chastellicke, das isch ä sattu zwischem Stockji und em gross Chastelhorn. D Sarah u dr Mirko hei e mögleche Lawinehang analysiert und entschide dass mir am sunnti nid ufs gross chastelhorn sondern ufs chly chastelhorn gö. Schöni häng hei mir ka zrügg zur hütte, ab und zue chli bruchharsch aber nid allzu schlimm. D Ussicht vo jedem punkt us isch eich troumhaft gsi, ds Wisshorn und Matterhorn als star of the show. Bir Hütte isch de d Choch und Bach-Action ufem rouchige Houzofe losgange. Glücklecherwiis hei es paar angeri Anke mit Hefe vrwächslet, sodass Vali und Vale zwöi geniali Züpfene hei chönne härezoubere. D Äuplermagrone hei üsi hungrige Mäge guet gfüut, o wesi visuell ke priis würde gwinne. Optisch isch da d Candellight Atmosphäre scho beihdruckender gsi (wiu dr strom immer usgange isch). Nachärä churzä Touräplanig simer när oh relativ früäch ihs Näst gchrochä. Temperatur im Schlag isch zwar eher ih Richtig Ihshölä-Biwack gangä, aber aui hei d Nacht meh oder weniger erhousam überstandä. När si mir de langsam uf und hei Zmörgelet mit Bialetti kafi und Zopf, nachem Abwäsche hei mir üs langsam uf en weg gmacht. Nachemä agnähmä ufstig si mi de ufs chly chaspelhorn cho, denn si mir es stück i schönstem puufer abägfahrä. Mir hei so fröid ka, dass mir grad no e chline gipfu (top secret, het eich ke name) no drzue hei gno, de hei mir schnäu ufgfäuet und obe hets wieder e bombe ussicht gä. Bir abfahrt zur hütte hei mir premium Häng gha, eich super pulver und zwüschdüre heimr o die ersti Spur inezoge. Nur fliegen ist schöner. Ungä ahcho hei natürlich wieder chli Carbs ihnämuässä, zum Glück hets no äh Schüsslä Älpnermaggaronenrästä gha. Mir hei när no chli d Sunne gnosse und d Hütte vo de Überräste vo üsne Übernachtigsgfährte befreit, bevor mr üs uf d Abfahrt richtig Münster gmacht hei. Zersch widr düre Pulver und zwüsche de Böim düre, später vorsichtig em Wäg entlang richtig Bahnhof. Z Wätter a dene zwöi Tag isch entgäge dr Prognose 1A gsi, üsi Truppe super motiviert und o d Planig, Erklärige und Tipps vor Toureleitig hei nüt z wünsche übrig gla. Merci Sarah und Mirko!