Hochtouren-und Alpinkletterwoche

Fit u munter simr ds 8. in Richtig Göscheneralp losgfahre. Bim ufeloufe zur Bärgseehütte heimr teils nöii Bärgschueh ighloffe oder grossi Ruckseck testet – es het sech beides guet bewährt mit dä vorsteubare Schwirigkeitä. Mir hei bim näche Hüttesektor o scho ersti Route klätteret u si parat gsi für grösseri Toure für die nächste Täg. Es erschts Bad im See het natürlech ou nid dörfä fählä.

Am nächschtä Morgä heimer ir Hütte wägem Näbu d Touräplanig agluegt. Am Nami heimer de trotzdäm no ä chlini Mehrseillängi chönnä chlätärä.

Am Tag druf hets leider nid besseri Sicht gha u mir hei 3,5 stung vrgäbens druf gwartet dases tröchnet. Aus troscht heimer drfür ä Röschti zum Zmittag gässä u üsi Bärgschueskills bim Chlätterä vrbesseret. Dr Fred gseht aber immer no Luft nach obe bi dä, Skill. Im näbu hets am Abä o no es Pavianäbad gä. (Für auui wo dä Insider nid kennä, steuet nech d Meerängi vo Gibraltar vor, es paar Affe si im See aber um die wos geit die sitzä ufem Stei im trochnä aber umgäh vo Näbu u luegä denä im Wasser zue.)

Wos när ufzogä het heimer ändlech üsi planti tour chönnä machä, inklusive Gratchläterei und Schlingä platzierä. Zum ds no meh üebä simer am Tag druf nomau ä Grat ga chlätterä u zuesätzlech simer no abgseilet. Mä hät itz öppä nach jedem Satz no chönnä erwähnä dasmer es Tichu gspiut hei, abr ds wär chli längwilig zum läsä. Fürä Abschluss heimer no nä grösseri Tour uf z Sustähorä gmacht, dr Pris vor Ussicht nachem Gipfu hei abr leidr d Chnöi zaut. Wüui die Tour doch sehr läng isch gsi, isch dr Bricht drzue eher churz ghaute.

Mitem Abschluss vo däm Lager geit o am Fred sini JO Leiterkarrierä z änd u mir möchtä üs härzlech bi ihm bedankä das är sit 46 Jahr üs sini Erfahrig witervermittlet het u üs uf so viunä Tourä gleitet het. Danke Fred für die Wuche und dis riisä Engagement über die vilä Jahr!