Hochtourelager i der Rotondohütte bi Sunne und (bitz) Räge

Tag 1: Der Anfang
Ausnamswis si mir eher schpät ufä zug so öppä am achti. Nächär si mir gägä z‘wallis tuckeret uf das Brig. Vo dert us hets ä längi durschtschtecki für füdlä u gmüet gä wü ds zügli dürd‘s goms eher sech gmüetlech het transferiert. Chum si mr in realp a cho simer richtig rotondo Hüttä los gwatschtet. Leider hets bim erschtä pöisu d durschtstrecki furd’s füdlä nur ä churzi pousä gha bi ere gwüsse person. wüu dr M.H (Name der Redaktion bekannt) sich truriger wis het i es Ameisi Inferno nidergla. Ds ds nid ä so optimau isch verschteitsäch. Näch däm chlinä töif geits aber numä no bärguf bis id hüttä. Ir hüttä hei mir üs nach hertem zwöi oder meh kampf ä platz eroberet. Denach simmer am churze oder chli längere Seil go umetanze und hend de drü Meter hochi Hüttegipfel erklomme. A dem Tag hemmer au scho die erste Hüttefinke-Boulderproblem usegfunde.
Zum Znacht sind üs feinsti Älpermacarone serviert worde und dür die übermässig Tea Time community aka JO Bärn isch folgendi Wett abgschlosse worde: wer am schlechteste schätzt, wie viel Liter Tee trunke werded, muss in Bergsee go bade.
D Wette gönd vo 30 Liter zu 70 Liter.
Auflösung folgt…
Tag 2: Man kann keine Zeit gewinnen, nur verlieren
Am zmorge hett dr Milo si Tee versüesst, sodass är speter ä zuckerschock hett becho. När simer de scho richtig Chlis Leckihorn spaziert. Mit seili u gurt heimer loufe am churzä seili güebt. Nach es paar chlätterpartie simer churz ufem gipfu chillt, hei ä philosophischi viertustung über zyt management idä bärge gha (mä cha zyt nid gwinne, nume verlüre heimer glehrt. Speditiv ist the way to go!), bevor mir mit stigise si abgloffe, speter de abgrütscht (haub freiwiuig, zum teu si lüt mit viu energie u motivation dr hang abgrütscht). Mit nasse chleider simer zum gletschertor, womer üs chli iz lääre hei la bambele u viu seili zoge hei (sog. Flaschenzug). Mit viu theorie im gring simer zur hütte u ufd terrasse gläge, um au das wüsse z verarbeite. Zletscht heimer am aabe no chli fantasie-route planet u drzue viu tee drunke (schlussändlech wei mer uf üsi 70L cho)
Tag 3: Trocheüebige
Nach bösem erwachä wägä inen schiffen startet dr eher dürzognig dritt tag. Wägä rägä hei mir hüt kes hochtürli planet. Dä beseit rägä het aber chli uf sich la wartä. Und so hei mir när im warschta Sinn vom Wort ä trochäüebig zu standboua und friends und keilä setzä chönnä machä. Nach derä operation hei mr de aus erschts mau müesse znüni nää. Dürd‘s abseilä hei mir üs immer meh bis när ganz ufä bodä fodä Tatsachä bracht. Aber wiu s im läbä mengisch au bärguf gaht, simer die wand nächär wieder duruf kraxlet.
Dür d route "Direkt zum Abendessen" hemmer denn gad aschlüssend üses zmittag ignoh. U i du heimer glück gha, gd i däm momänt hettsech d sunne zeigt u mir hei da ä schöni zyt zum sünnele u rätsu löse gha. Hie es bispiu für üsi läserinne u läser: wenn di grüeni chugle ufz gras geit u die blaui chugle ufz wasser, uf was geit de di wissi chugle? Wenn dir d lösig gfunge heit, chöiter stouz si. Wäge räge si mir när ine u hei no zwöi theoretischi toure planet. Dr milo hätt sini theoretischi tour am liebste am vieri gstartet, dass dr früeufsteher oli o sicher zfride dermit isch.
Ds mr de morn dr wäg ganz sicher finge (o we z wätter hervorragend wird si), heimer für di morgigi tour aui azimute iizeichnet.
Nach dere ganze Theorie hend mir zerschmal e Pause brucht.
Die pouse hett aber ni dörfe zlang si, mir si ja schlussändlech ni da zum pfuse. Aus letschti üebig heimer de no güebt, wie mä im räge säubstufstig macht. Es geit, aber ohni räge isches äuä scho chli aagnähmer. U wider heimer üs richtig abendessen direkt emporhobe, u wider isch z znacht deliziös gsi.
Üse Bergführer-Aspirant het sogar no s Bärner Tichu glernt und s het no en Jass geh mit französische Charte (wääh!)
Tag 4: Das Ende
Mit meh oder weniger azimut simer uf üsem gletscher richtig witewasserestock ds ume gschnaaget. Nach ere chline jogging-iilag dank em liebe Simon simer de doch amne punkt aacho, wo jogge chli aazsträngend isch u mir de glich ufz churze seil hei gwächslet. Nach ere witere, teilwis eher exponierte traverse simer de (ohni abstürz) am iistig gsi. Nach ere leider chle z churze uf- und abchlätterpartie ume gipfu simer de scho wider i däm cheibe exponierte schneefäud gsi. Zum glück isch o hie aus guet gange, o wenn mir teilwis chli iz schwitze si cho. När heimer nis am gliche ort wie bim ufstig vom joggingfieber la packe u si dä gletscher ds abegsecklet. Zmittag am Gletscher-Beach mit schwumm im Tümpu (e verloreni Wett muess schliesslech ighaute werde: 70L isch doch rächt witt wäg vo 42L...) het zyt gha bevor mir de scho iz tau si. Am abstig simer a viune orte verbigloffe womer scho kenne, zb ä ameisihuufe, wo chli hett müesse lide (öpper hett sech müesse räche - aber keine Tiere wurden verletzt!). U när zäck bum zug hei!