Traumlücke

Nachdem mir üs fasch alli z Bern troffe hend, isch d Gruppe denn schlussendlich komplett in Grimmialp ahcho. Det hemmer agfähled und hend direkt chöne im Schnee loslaufe. Da mir JO, isch d Strass z eifach für üs und mir sind dur de Wald uegrutscht.
Wiiter obe hemmer üs für de Ufstieg entschiede, wo mir no es paar Spitzkehre hend chöne üebe und hend plötzlich chli Pulver unter de Füess gha.
Obe ahcho het üs de Mauro bibracht, wie mer richtig Fähli abzieht (wenn mer keis Netzli het) und das wird s Lebe fest vereifache ide Zuekunft. Nach eme churze Zmittag mit schöner Ussicht und eme Gipfelfoti, hemmer üs für die wenig befahreni aber schlechter erreichbari Abfahrt entschiede. Es het sich trotz Zruggtraversiere glohnt für die paar schöne Schwüng.
Es het sogar no für e churzi Analyse vom Schneedeckeufbau glanget.
De Tag het gendet mit enre schöne Abfahrt über d Strass im Wald und mir sind glücklich und zfriede dune acho. Im Zug nach Bern hets sogar no für e churzi Tichurundi ufm Bode glanget.
Leider simmer zMünsige vrsandet da dBahn Problem het gha. Imne Ersatzzug si mer gstopft wie Sardinli mit zwöi Stung Verspätig in Bern acho :).